البارحة جاني مـن الحـب مرسـال من عقب ما بينـي وبينـه خصيمـة
وأنا ترى في الحـب ماني بفعّــال ولا بعـد ولّـع بقلبـي هشيـمـه
ولا بعد غنّيت فـي ساعـة وصـال ولا بعد ذقـت الفـراق وجحيمـه
ولا جرى دمعي على الخـد همّـال ولابعـد جربـت مــرّ الهزيـمـة
حتى وردنـي تالـي الليـل جـوال وأنا على شاي وبسكـوت ديمـة
الرقم بايخ لكـن الصـوت قتـال كنه مثل صـوت المذيعـة حليمـة
قالت مساء الخير يـا طيّـب الفـال قلـت رحبـي ترحيبـةٍ مستديمـة
بالعود والصفـري ودلـة وفنجـال واجبك يا بنت الأصـول الكريمـة
ردت بضحكة ثم قالت وش الحـال؟ قلت اشهد إن الحال عقبك سقيمـة
قالت وهي تضحك بعد مثل الأطفال وأنـا بعـد كنـي بدونـك يتيمـة
من يـوم قالتهـا تزلزلـت زلـزال من فجعتي كنـي مسـوي جريمـة
قلت ارفعي صوتك ترى مابه إرسال كـذاب لكـنّ المصيبـة عظيمـة
قالت أقول اسمع ترى هرجنـا طـال ممكـن تصاحبنـي ترانـي وسيمـة
واسمي الحقيقي أول حروفـه الـدال لكـن يسمّونـي البنـات الزعيمـة
صحيح أحب الفخفخة واعشق المال لكـن ترانـي طاهـرة مستقيـمـة
ما عندي مغازل ولا (لعب جهّـال) ما عندي إلا في الشرف والحشيمـة
بس الصراحة قلبي لشوفتـك مـال واصبحت وحدك جالسٍ في صميمه
فكّر بعقلك واترك القيـل والقـال واحذر تطيع أهــل العقـول العقيمـة
وارسل علي الحين خمسميـة ريـال أشحن بهـا جـوال أختـي غنيمـة
أو طقم غالي فيه خاتـم وسلسـال أروح بـه فـي عـرس ولاّ عزيمـة
قلت الحقيقة ماني برجـل أعمـال ولاني بتاجر والمـوارد عديـمـة
أنا الصراحة شبـه عطّـال بطّـال وعلاقتـي بالفقـر جـداً حميـمـة
والراتب الله يرحم الحال مـا زال محـدود والمصروف ربي عليمـه
والدين بـالآلاف والبنـك شغّـال ياكـل فلوسـي بالربـا والظليمـة
والسوق طايح والغلا ضيّـق البـال والموت والله صايـر اكبـرغنيمـة
قالت تحمّل بـس والحمـل ينشـال خلك شديد الباس صلـب العزيمـة
ياخي تصرّف جعلك تصيـر نشّـال أهـم شـي إن النوايـا سليـمـة
لابد تفهمني علـى كـل الأحـوال ما دمت من أهل العقـول الفهيمـة
قلت إيه والله فاهم اللي على البـال لكن تـرى هـذي علينـا قديمـة
يا بنت هـذا صايـر اليـوم مـوال للي تبي تلعب علـى ابـن اللئيمـة
يا بنت ما تدرين كـم فيـه محتـال يلعب على الحبلين وانتـي غشيمـة
يا بنت كم من جاهلة دمعها سـال من عقب ما جات العواقب وخيمـة
والبنت لا اقفى عرضها بيد الأنـذال والله مـا يبقـى لهـا أي قيـمـة
قالت تبي ولاّ فخلّك علـى جـال مهو بناقصـني نصايــح حكيمـة
عـز الله إنك للأسف منـت رجّـال وانك قليل الذوق ما فيـك شيمـة
يا لعن أبو اللي مـا يسطـرك بنعال حتـى يعلمـك الغـزل يـا بهيمـة
( تفو ) عليك وصكّت الخط في الحال مدري ( تفو ) هي مدح ولاّ شتيمـة